پنجاب کے شہر ساہیوال کے علاقے کربلا روڈ پر انسانیت کی خدمت کے جذبے کے تحت کیپٹن عثمان شہید فری ڈسپنسری کا باقاعدہ افتتاح کر دیا گیا، جہ...
پنجاب کے شہر ساہیوال کے علاقے کربلا روڈ پر انسانیت کی خدمت کے جذبے کے تحت کیپٹن عثمان شہید فری ڈسپنسری کا باقاعدہ افتتاح کر دیا گیا، جہاں غریب اور مستحق افراد کو مفت طبی سہولیات فراہم کی جائیں گی۔
افتتاحی تقریب کی خاص بات یہ تھی کہ ڈسپنسری کا افتتاح کیپٹن عثمان شہید کی والدہ محترمہ نے اپنے ہاتھوں سے کیا۔ اس موقع پر شرکاء نے شہید کی قربانیوں کو خراجِ عقیدت پیش کیا اور جذباتی مناظر دیکھنے میں آئے۔
تقریب میں سیاسی، سماجی اور مذہبی شخصیات سمیت شہریوں کی بڑی تعداد نے شرکت کی۔ نمایاں شخصیات میں ملک قاسم ندیم (ممبر صوبائی اسمبلی پنجاب)، شفیق احمد ڈوگر (ڈائریکٹر ڈویلپمنٹ اینڈ فنانس)، پیر احسان الحق ادریس، جید علماء کرام اور معززینِ علاقہ شامل تھے۔
شہداء کی قربانیاں قوم کا فخر
تقریب سے خطاب کرتے ہوئے شفیق احمد ڈوگر نے کہا کہ شہداء قوم کا فخر ہیں اور وہ ہمیشہ زندہ رہتے ہیں۔ انہوں نے کہا کہ کیپٹن عثمان شہید نے ملک کی خاطر اپنی جان قربان کر کے ایک عظیم مثال قائم کی جسے آج اس فلاحی منصوبے کی صورت میں آگے بڑھایا جا رہا ہے۔
انہوں نے شہید کے والدین کو اس نیک اقدام پر مبارکباد دیتے ہوئے یقین دلایا کہ حکومت اور انتظامیہ اس فلاحی مقصد میں ان کے ساتھ کھڑی ہے۔
عوام کے لیے مفت طبی سہولیات
منتظمین کے مطابق فری ڈسپنسری میں مفت طبی معائنہ اور ادویات فراہم کی جائیں گی جس سے علاقے کے غریب اور مستحق افراد کو بڑا ریلیف ملے گا۔
مقامی شہریوں نے اس اقدام کو سراہتے ہوئے کہا کہ کربلا روڈ جیسے گنجان آباد علاقے میں فری ڈسپنسری کا قیام انتہائی ضروری تھا جس سے سینکڑوں خاندان مستفید ہوں گے۔
تقریب کے اختتام پر ملک کی سلامتی اور کیپٹن عثمان شہید کے درجات کی بلندی کے لیے خصوصی دعا بھی کی گئی۔
کوئی تبصرے نہیں